Listen Now

Strákarnir okkar leika nú listir sínar á HM í Rússlandi, okkur öllum til ánægju og yndisauka. En formáli þessarar Öskubuskusögu, eins og hún hefur verið kölluð, var skrifaður þann 17. júlí 1946.

Öll þekkjum við Björk, Bo og Bubba, en færri muna eftir skapstygga svaninum Kára, eða fótfráustu sauðkind Íslandssögunnar, Surtlu. Dýr hafa margoft ratað í fréttir hér á landi og þeir Kjartan og Haukur rifjuðu upp nokkur eftirminnileg.

Árið 1995 var haldin metnaðarfull tónlistarhátíð þar sem teknóið var í hávegum haft. Öllu var til tjaldað og lítið mátti út af bera til að allt færi í vaskinn, en skatturinn var eitt af fjölmörgum ljónum í vegi Uxa. Kjartan og Haukur rifjuðu hátíðina upp á Tímarit.is.

Fyrsta kynslóð íslenskra gosþambara varð til í lok 19. aldar, tannlæknum til mikillar mæðu, en drykkjan hefur síður en svo minnkað, nú rúmri öld síðar. Þeir Kjartan og Haukur skoðuðu þessi upphafsár ropvatnsins og allt gómsæta gosið sem gleymdist. Allt að sjálfsögðu grafið upp á Tímarit.is.

Árið 1984 eignuðust Íslendingar sterkasta mann heims. Árið 1985 var það síðan fegursta kona heims. Auðvitað lá það því beinast við að við sigruðum í Eurovision í fyrstu tilraun okkar árið 1986. Kjartan og Haukur rifjuðu þessa metnaðarfullu tilraun upp á Tímarit.is.

Veitingageirinn er erfiður bransi og hafa fjölmargir matsölustaðir gengið á vit feðra sinna eftir hetjulega baráttu. Sælkerarnir Kjartan og Haukur skoðuðu nokkra, eftirminnilega jafnt sem löngu gleymda, á Tímarit.is.

Fjöldi Íslendinga telur sig hafa séð fljúgandi furðuhluti og hafa fréttir af slíku borist úr öllum landsfjórðungum. En hvað vilja þessir forvitnu ferðalangar okkur? Sófasagnfræðingarnir Kjartan og Haukur flettu sig í gegnum skrítnustu skrifin um þessar heimsóknir á Tímarit.is.

Diskóið var komið langt fram yfir síðasta söludag og þjóðina þyrsti í eitthvað nýtt og spennandi. Ásbjörn nokkur Morthens svaraði kallinu og varð á einu ári vinsælasti tónlistarmaður landsins. Kjartan og Haukur skoðuðu Bubbaárið mikla 1980.

Frá útlöndum bárust fregnir af fólki sem endaði á geðveikrahæli eftir að hafa séð kvikmyndina The Exorcist, svo svæsin þótti hún. En hvernig tóku Íslendingar þessari djöfullegu mynd? Kjartan og Haukur fundu svörin við því á Tímarit.is.

Árið 1990 gafst hinum venjulega Íslendingi í fyrsta sinn tækifæri til að þenja raddböndin „við undirleik stórhljómsveitar á geisladiski“. Kjartan og Haukur skoðuðu málið nánar.

100 ár eru liðin frá Frostavetrinum mikla, þar sem hvert kuldametið á fætur öðru var slegið. Þeir Kjartan og Haukur glugguðu í blöðin frá þessum fræga vetri.

Í þessum fyrsta þætti fletta þeir Kjartan og Haukur því sem skrifað var um hina umdeildu og illa greiddu „Bítla“ í íslenskum fjölmiðlum. Allt efni má finna á Tímarit.is.